— नेपाली क्रिकेटका अनुभवी खेलाडी अमित श्रेष्ठले अन्तर्राष्ट्रिय क्रिकेटबाट सन्यास लिएको घोषणा गरेका छन्। उनले बुधबार सामाजिक सञ्जालमार्फत स्टाटस लेख्दै आफ्नो लामो क्रिकेट यात्रामा ब्रेक लागेको जनाएका हुन्। विभागीय टोली नेपाल पुलिस क्लबबाट खेल्दै आएका अमितले भने, “नेपाली यू-१९ टिमको जर्सी लगाएर देशको प्रतिनिधित्व गर्नु मेरो जीवनको सपना थियो, जुन पूरा भएकोमा गर्व लाग्छ।”
३१ वर्षीय श्रेष्ठले सन् २०१३ मा एसीसी यू-१९ इलाइट कप र एसिया कपमा नेपालका लागि खेलेका थिए। फ्रेन्चाइज क्रिकेटतर्फ उनले एभरेष्ट प्रिमियर लिग, धनगढी प्रिमियर लिग र पोखरा प्रिमियर लिग जस्ता चर्चित प्रतियोगितामा दमदार प्रदर्शन गरेका थिए। यस्तै, उनले गत वर्षको नेपाल प्रिमियर लिग (एनपीएल) मा सुदूरपश्चिम रोएल्सबाट मैदान सम्हालेका थिए।
तर, उनको करिअरको एक दुखद पाटो के रह्यो भने डेढ दशकको समर्पणपछि पनि उनी सिनियर राष्ट्रिय टिममा खेल्न भने पाएनन्। सन् २०१२ मा उनले घरेलु क्रिकेटमा लगातार दुई खेलमा शतक हानेर चर्चा बटुलेका थिए, तर त्यो चमक राष्ट्रिय टिमसम्म पुर्याउन सकेन।
यद्यपि, क्रिकेट प्रतिको उनको माया अझै बाँकी छ। उनले स्पष्ट पारेका छन् कि अन्तर्राष्ट्रिय क्रिकेटलाई बिदाइ दिए पनि डोमेस्टिक प्रतियोगितामा भने उनी सक्रिय रहनेछन्।
क्रिकेटको मैदानमा आफूले पाएको अवसरलाई धन्यबाद दिँदै उनले भोलिका खेलाडीहरूलाई प्रेरणा दिनसक्ने संकेत पनि गरेका छन्।
के तपाईंलाई लाग्छ, यस्ता प्रतिभावान खेलाडीलाई राष्ट्रिय टिममा मौका दिनुपर्ने थियो?
Leave a Reply