मंगलबार कालीमाटी फलफूल तथा तरकारी बजारमा परीक्षणका क्रममा हरियो धनियाँमा अत्यधिक विषादीको मात्रा फेला परेको छ। कालीमाटी फलफूल तथा तरकारी विकास समितिका अनुसार परीक्षणमा ल्याइएको हरियो धनियाँको नमुनामा ९९.३७ प्रतिशत रोकावट स्तर देखिएको छ।
यो धनियाँ काभ्रेका एक किसानको बारीबाट संकलन गरिएको थियो। सामान्यतया रोकावट स्तर ४५ प्रतिशतभन्दा बढी भएमा सो तरकारी वा फलफूल उपभोग गर्न अयोग्य ठहरिन्छ।
केन्द्रीय कृषि प्रयोगशालाअन्तर्गत देशभर १२ वटा विषादी अवशेष द्रुत विश्लेषण प्रयोगशालाहरू सञ्चालनमा छन्। ती प्रयोगशालामा कार्बामेट र अर्गानोफस्फेट समूहका विषादीको परीक्षण गरिन्छ।
परीक्षणको नतिजा कालीमाटी समितिलाई दिइने छ, र अत्यधिक विषादी पाइएको तरकारीलाई तुरुन्त नष्ट गरिन्छ।
यसअघि पनि स्थानीय काउली, ब्रोकाउली, तिते करेला, तनेबोडी र रायोको सागमा विषादीको मात्रा अत्यधिक भेटिएको थियो, जसले उपभोक्ताको स्वास्थ्यमा गम्भीर असर पार्न सक्छ भन्ने चिन्ता बढाएको छ।
Leave a Reply