एजाज खान बलात्कार मुद्दा: अग्रिम जमानत अस्वीकार, हिरासतमा अनुसन्धान हुने

मुम्बई – बलात्कार आरोपमा मुछिएका अभिनेता एजाज खानको कानुनी समस्या थप गम्भीर बन्दै गएको छ। मुम्बईको एक सेसन अदालतले बिहीबार उनीद्वारा दायर गरिएको अग्रिम जमानत निवेदन खारेज गरेको छ।

एक अभिनेत्रीले खानविरुद्ध बलात्कारको उजुरी दिएकी छिन्। उजुरी अनुसार, एजाजले आफूलाई विवाह गर्ने बहानामा लामो समयदेखि सम्बन्धमा राखेको आरोप लगाइएको छ। पीडित महिलाले खानले आफूलाई सेलिब्रेटी र रियालिटी शो होस्टको रूपमा परिचय दिँदै प्रभावित पारेको र अप्रिल महिनामा विवाह गर्ने आश्वासन दिएको उल्लेख गरेकी छन्।

एजाजले भने अदालतमा आफू पहिले नै विवाहित रहेको महिलालाई थाहा भएको दाबी गरेका छन्। उनका अनुसार, दुबैले आपसी सहमतिमा सम्बन्ध राखेका थिए। उनले यो मुद्दा व्यक्तिगत बदला र आर्थिक दबाब स्वरूप आएको जिकिर गर्दै पीडित महिलाले मुद्दा फिर्ता गर्न १० लाख भारतीय रुपैयाँ मागेको आरोप पनि लगाएका छन्।

तर अदालतले उनका दावीलाई अस्वीकार गर्दै, प्रस्तुत गरिएको व्हाट्सएप च्याटमा पैसा मागेको कुनै स्पष्ट प्रमाण नदेखिएको बताएको छ। साथै, प्रहरीले एजाजको फोन अझै बरामद नभएको, च्याट तथा अन्य डिजिटल प्रमाणहरूको परीक्षण गर्न बाँकी रहेको बताउँदै हिरासतमा अनुसन्धान आवश्यक भएको जनाएको छ।

प्रहरीले यसअघिका लागूऔषध मुद्दामा समेत एजाज संलग्न भएको जानकारी अदालतलाई दिएको छ। यदि अग्रिम जमानत दिइयो भने उनले प्रमाण नष्ट गर्ने वा साक्षीहरूलाई प्रभावमा पार्न सक्ने सम्भावना रहेको भन्दै प्रहरी पक्षले विरोध जनाएका थिए।

अदालतले यी सबै विषयलाई ध्यानमा राख्दै अग्रिम जमानत अस्वीकार गर्ने निर्णय गरेको हो। यससँगै एजाज खान अब प्रहरी अनुसन्धानको क्रममा हिरासतमा रहने पक्का भएको छ।