खोटाङ — मैयुङ ट्याम्के साल्पा सिलिचुङ पर्यटन प्रवद्र्धन केन्द्रले ‘ग्रेटर मुन्दुम ट्रेल’ नामक विशेष पदमार्गको विकास गरेको छ, जसले नेपालका तीन भू-भागहरू — तराई, पहाड र हिमाल — समेट्छ।
पूर्वी तराईको खुवालुङबाट सुरु हुने यो ट्रेल खोटाङ, भोजपुर, सोलुखुम्बु हुँदै सिधै सगरमाथा (चोमोलुङ्मा) सम्म पुग्न सकिने गरी निर्माण गरिएको हो। पदयात्रा प्रेमीहरूका लागि छोटो र रोमाञ्चक गन्तव्य बनाउने उद्देश्यसहित यो योजना अघि सारिएको हो।
पर्यटन केन्द्रका अध्यक्ष रमेशकुमार राईका अनुसार ग्रेटर मुन्दुम ट्रेललाई तीन भागमा विभाजन गरिएको छ। खुवालुङदेखि तावाभञ्ज्याङसम्म ‘लोअर मुन्दुम ट्रेल’, तावाभञ्ज्याङदेखि साल्पासिलिचुङसम्म ‘मुन्दुम ट्रेल’ र छेस्कामदेखि सगरमाथासम्म ‘अपर मुन्दुम ट्रेल’ अन्तर्गतको मार्ग निर्धारण गरिएको छ।
महाकुलुङ गाउँपालिकाको समन्वयमा गरिएका अन्वेषण तथा अध्ययनका क्रममा पदमार्गको सविस्तार नक्शा, पर्यटकका लागि उपयुक्त बासको स्थान र सांस्कृतिक तथा प्राकृतिक विशेषता पहिचान गरिएको छ।
यो ट्रेलको अद्वितीयता भनेको विविध भू-परिवेश र जलवायु अनुभव हो। कोशीटापुमा पाइने अर्ना तथा तराईका वन्यजन्तुबाट सुरु हुने यात्राले पहाडी घाँसे मैदानमा चौरी तथा भेडा हेर्न पाइन्छ भने हिमाली भागमा पुग्दा तुसारो, हिमाल र त्यहाँका जैविक विविधता अवलोकन गर्न सकिन्छ।
पर्यटन केन्द्रले यो ट्रेललाई नेपालको पहिलो बहु-भू-भाग समेटिएको विश्वस्तरीय पदमार्गको रूपमा स्थापित गर्ने लक्ष्य राखेको जनाएको छ।
Leave a Reply