दक्षिण कोरियामा मौसमी कामदार पठाउने विषयमा सम्झौता भएको भन्दै फैलाइएको विज्ञप्तिबाट सचेत रहन मन्त्रालयको आग्रह

काठमाडौँ । श्रम, रोजगार तथा सामाजिक सुरक्षा मन्त्रालयले किर्ते हस्ताक्षरसहित सार्वजनिक गरिएको एक भ्रमपूर्ण प्रेस विज्ञप्तिबाट सचेत रहन सर्वसाधारणलाई आग्रह गरेको छ।

मन्त्रालयले शुक्रबार प्रेस नोट जारी गर्दै दक्षिण कोरियामा मौसमी कामदार पठाउने सम्बन्धमा नेपाल र दक्षिण कोरियाबीच कुनै सम्झौता नभएको प्रष्ट पारेको हो। मन्त्रालयका अनुसार चैत्र २५ गतेको मितिमा दुई देशबीच भगिनी सम्झौता भएको र त्यसलाई कार्यान्वयन गर्न स्थानीय तहहरूले मन्त्रालयमा सम्पर्क गर्नु भन्ने आशयको विज्ञप्ति पूर्ण रूपमा झुटो तथा किर्ते भएको पुष्टि भएको छ।

विज्ञप्तिमा प्रयोग गरिएको हस्ताक्षरसमेत किर्ते देखिएको भन्दै मन्त्रालयले यस्ता झूटो प्रचारबाजी नगर्न र भ्रममा नपर्न सबैलाई सचेत गराएको छ। साथै, झुटो सूचना फैलाउने व्यक्ति वा समूहविरुद्ध आवश्यक कानुनी कारबाही अघि बढाइने चेतावनीसमेत दिएको छ।