प्रधानमन्त्री ओलीद्वारा ‘श्रम संसार’ पोर्टल उद्घाटन: रोजगारीमा पहुँच, श्रमको सम्मान र सीप अभिवृद्धिमा जोड म्युज खबर | काठमाडौं, वैशाख १८

१३६औं अन्तर्राष्ट्रिय श्रमिक दिवसको अवसरमा प्रधानमन्त्री केपी शर्मा ओलीले बिहीबार भर्चुअल माध्यमबाट ‘श्रम संसार’ पोर्टलको औपचारिक उद्घाटन गरेका छन्।

प्रधानमन्त्री ओलीले उक्त पोर्टललाई सरकार, निजी क्षेत्र र नागरिकबीच सेतुको रूपमा चित्रण गर्दै यसले रोजगारीमा पहुँच सहज बनाउने र श्रमिक, रोजगारदाता र सेवाप्रदायकबीचको दुरी हटाउने बताएको छ।

योग्यता, सीप र अवसरलाई जोड्ने डिजिटल माध्यम

प्रधानमन्त्री ओलीका अनुसार श्रम संसार पोर्टलले:

• रोजगारी चाहने व्यक्तिहरूलाई अवसर पत्ता लगाउन सहयोग गर्नेछ,
• रोजगारदातालाई योग्य जनशक्ति छान्न सजिलो बनाउनेछ,
• सीपमूलक श्रमप्रतिको सम्मानको संस्कार विकसित गर्नेछ।

उनले भने, “जब सीपमूलक जनशक्ति रोजगारीमा जोडिन्छ, तब समृद्ध नेपाल सम्भव हुन्छ। श्रमिकको कल्याण र महिलाको आत्मनिर्भरता नै सुखी नेपालीको आधार हो।“

निःशुल्क सेवा, नागरिक एपमा पनि समावेश हुने तयारी

श्रम, रोजगार तथा सामाजिक सुरक्षा मन्त्रालयका अनुसार पोर्टल प्रयोग गर्दा कुनै शुल्क लाग्दैन। यो डिजिटल प्लेटफर्ममा:

• रोजगारीसम्बन्धी सूचना,
• आवेदन दिने सुविधा,
• उद्यमशीलता र सफलताको प्रेरक कथाहरू,
• सीपको दर्ता र प्रमाणीकरण सम्बन्धी जानकारीहरू उपलब्ध हुनेछन्।

प्रधानमन्त्री ओलीले यस पोर्टललाई निकट भविष्यमा ‘नागरिक एप’सँग एकीकृत गर्न निर्देशनसमेत दिएका छन्।

आन्तरिक रोजगारी प्रवर्द्धन दशक घोषणा

प्रधानमन्त्रीले सरकारद्वारा सुरु गरिएको आन्तरिक रोजगारी प्रवर्द्धन दशक अन्तर्गत श्रम बजारमा गम्भीर सुधार र नागरिकको सीप विकासमार्फत रोजगारी सिर्जना गर्ने रणनीति तयार भइसकेको जानकारीसमेत दिए।