लुम्बिनी प्रदेश सभा छैठौँ अधिवेशन वैशाख ३१ गते दिउँसो १ बजेबाट सुरू हुने

दाङ — लुम्बिनी प्रदेश सरकारले छैठौँ प्रदेश सभा अधिवेशन यही वैशाख ३१ गते आह्वान गर्ने तयारी गरेको छ। मुख्यमन्त्री चेतनारायण आचार्यको अध्यक्षतामा बुधबार बसेको मन्त्रिपरिषद् बैठकले अधिवेशन आह्वानको सिफारिस प्रदेश प्रमुख समक्ष गर्ने निर्णय गरेको हो।

सरकारका प्रवक्ता तथा कृषि, भूमि व्यवस्था तथा सहकारी मन्त्री दिनेश पन्थीका अनुसार अधिवेशन वैशाख ३१ गते दिउँसो १ बजेका लागि तय गरिएको छ। यसअघि, पाँचौँ अधिवेशन गत फागुन ७ गते अन्त्य गरिएको थियो।

यसपटकको अधिवेशनमा बजेट पारित गर्ने प्रक्रिया, नीति तथा कार्यक्रम प्रस्तुत गर्ने तयारीसहित प्रदेश सरकार विभिन्न महत्वपूर्ण प्रस्तावहरू लिएर संसद्‍मा जान लागेको छ।