फेरि किन सर्‍यो लोसपाको महाधिवेशन?

लोकतान्त्रिक समाजवादी पार्टी (लोसपा) नेपालले फेरि एकपटक आफ्नो महाधिवेशन सार्नुपरेको छ। अध्यक्ष महन्थ ठाकुरद्वारा जारी विज्ञप्तिमा २०८२ साउन मसान्तभित्र महाधिवेशन सम्पन्न गर्ने निर्णय गरिएको उल्लेख छ। तर, यसको पछाडि सदस्यता नवीकरण, वडा र पालिकास्तरको अधिवेशनजस्ता तयारी अपूरा रहनु मुख्य कारण हो।

पार्टीले पालिकास्तरमा अधिवेशन गराइरहे पनि अझै पूर्णरूपमा सम्पन्न हुन सकेको छैन। तीन पटक म्याद थपेर पनि वैशाख १५ गतेसम्म पालिका अधिवेशन सम्पन्न हुन नसक्दा फेरि मिति सारिएको हो। हाल पार्टीले जिल्ला र प्रदेश अधिवेशनको तयारी गरिरहेको छ, तर गति सुस्त रहेको भन्दै धेरै नेताहरूले साउन मसान्तभित्र महाधिवेशन सम्भव नहुने बताएका छन्।

लोसपाले गत वर्ष जेठ ५ गते धनुषाबाट सदस्यता वितरणको अभियान सुरु गरेको थियो। पार्टीको लक्ष्य पाँच लाख सदस्यता वितरण गर्ने थियो तर हालसम्म के कति सदस्यता वितरण भएको भन्ने तथ्यांक कार्यालयमा आइपुगेको छैन।

महाधिवेशनका लागि चाहिने निर्देशिका भने पार्टीले पुसमै तयार गरिसकेको छ। वरिष्ठ उपाध्यक्ष जितेन्द्र सोनलको संयोजकत्वमा बनेको निर्देशिकामा वडादेखि केन्द्रसम्मको चुनाव प्रक्रिया, प्रतिनिधि चयन, ३३ प्रतिशत महिला सहभागिता लगायत समावेशी व्यवस्थाहरू उल्लेख छन्। साथै, विभिन्न तहमा निर्वाचन समितिहरू गठन गर्ने प्रक्रिया पनि निर्देशिकामा स्पष्ट छ।

अध्यक्ष महन्थ ठाकुर, जो १७ वर्षदेखि निरन्तर नेतृत्वमा छन्, तामलोपा, राजपा, जसपा हुँदै लोसपाको यात्रा गरेका छन्। २०७१ मा मात्र महाधिवेशन गराएको पार्टीले त्यसयता पटक–पटक मिति तय गर्दै पनि महाधिवेशन गर्न सकेको छैन।

राजपाको समयमा महाधिवेशनको मिति पटक–पटक सारिएको, विधानमा संशोधन गरेर समय थपिएको, अन्ततः आन्तरिक विवादका कारण महाधिवेशन हुन नसकेको इतिहास पनि दोहोरिएको छ। पछिल्लो चरणमा जसपाबाट अलग भई बनेको लोसपाले पनि अन्तरिम विधानमा पाँच वर्षभित्र महाधिवेशन गर्ने भनेको थियो, तर हालसम्म न त समिति पूर्ण छन्, न भ्रातृ संगठनहरू सक्रिय।

पार्टीभित्रको आन्तरिक संरचना अधुरो रहँदा, पुनः महाधिवेशन सर्नु भनेको संरचनागत कमजोरी, नेतृत्वमा विकल्पको अभाव, र संगठनात्मक शिथिलताको द्योतक हो।