📰 म्युज खबर | धनकुटा भेडेटारबाट गहना र नगदसहित दुई युवक पक्राउ, ९ लाखभन्दा बढीको अवैध सम्पत्ति बरामद

धनकुटाको साँगुरीगढी गाउँपालिका–६ स्थित भेडेटार चोकबाट प्रहरीले अवैध गहना र नगदसहित दुई जना युवकलाई नियन्त्रणमा लिएको छ।

प्र.१-०२–०५४ प २१६५ नम्बरको एफजेट मोटरसाइकलमा सवार भई धनकुटाबाट धरानतर्फ जाँदै गरेका दुई जनालाई शंका लागेर जाँच गर्दा, उनीहरूको साथबाट ठूलो परिमाणमा सुन–चाँदीका गरगहना र नगद रकम फेला परेको जिल्ला प्रहरी कार्यालय धनकुटाले जनाएको छ।

पक्राउ परेका व्यक्तिहरू मोरङको लेटाङ–८, जाँते निवासी ३० वर्षीय मनोज विश्वकर्मा र १९ वर्षीय धिरज विश्वकर्मा रहेका छन्।

प्रहरीका अनुसार, चालक धिरजको कालो झोलाबाट चाँदीजस्तो देखिने धातुका विभिन्न गहना, सुनजस्तो देखिने पाँच थान स–सानो टुक्रा, पाँच थान पेन्डेन्ट र नगद ८५ हजार ५ सय रुपैयाँ फेला परेको हो। बरामद गरिएका धातु तथा नगदसम्बन्धी कुनै बिलबिजक प्रस्तुत गर्न नसकेपछि उनीहरूलाई नियन्त्रणमा लिइएको हो।

लुम्बिनी सुनचाँदी व्यवसायी संघको समन्वयमा परीक्षण गर्दा चाँदीजस्तो देखिने धातुको तौल १,१४९ ग्राम रहेको पाइएको छ, जसको बजार मूल्य ५ लाख ४१ हजार रुपैयाँभन्दा बढी रहेको अनुमान गरिएको छ। त्यसैगरी, सुनजस्तो देखिने गरगहना जम्मा १२.७१ ग्राम तौलिएको र यसको मूल्य २ लाख ८६ हजार रुपैयाँभन्दा बढी हुने प्रहरीको भनाइ छ।

प्रहरीले बरामद गरिएका सम्पत्तिको कूल अनुमानित मूल्य ९ लाख रुपैयाँभन्दा बढी रहेको जनाएको छ।

पक्राउ परेका दुवै युवकलाई आवश्यक अनुसन्धान र कारबाहीका लागि राजश्व अनुसन्धान कार्यालय, ईटहरी पठाउने तयारी गरिएको जिल्ला प्रहरी कार्यालय धनकुटाका प्रवक्ता डिएसपी ओमप्रकाश खनालले जानकारी दिएका छन्।